This Blog is also available as an RSS Feed

Algemeen

‘n Pretbelaaide naweek by die Ficksburg Kersiefees

Die skilderagtige dorpie Ficksburg is tussen die Caledonrivier en die voet van die Imperaniberg in die Vrystaat Provinsie geleë. Dis die grootste kersieproduserende streek in Suid-Afrika en Ficksburg is dikwels in die wandel as Kersiestad bekend. Die Ficksburg Kersiefees is die oudste fees wat aan ‘n landbouproduk gekoppel word en vier sy 40ste herdenking vanjaar van 15 tot 17 November.

Die feesnaweek in Ficksburg is propvol vermaak met iets vir elke lid van die gesin. Die kleintjies kan die plaaswerf besoek en het ook ‘n opvoering deur Oliie die Nar, Jollie die Aap en Lulu die Rot. Daar is ook ‘n rolbaltoernooi, gholf kampioenskappe, perderuiter kompetisies en vertonings. Elke dag kan toeskouers meeding in ‘n kersiepit-spuug kompetisie. Die kroning van die voorskoolse mej Kersiebloeisel en mnr Kersiepit gaan die kroning van mej Kersiefees vooraf.

Die energieke besoekers kan reeds op die Vrydag deelneem aan ‘n 23km Kersiestap wat deur die Ficksburg Maratonklub gereël word. Die dag is vol met vermaak soos perde-items, gholf, feestoere, ‘n biertuin, ‘n vertoning van die wêreld se grootse Friesperde asook fietstoertjies deur Dylan Victor (SA se veldfietskampioen). Die aand se vermaak begin met ‘n aanbieding deur die Idol’s finalis Poseletso en dit word gevolg deur Karlien Hurselman, die Bala Broers en die Suid-Afrikaanse orkes, Eden.

Op die Sondag is daar die Kersie Pretdraf, die Kersie Veldfiets Uitdaag en ‘n tentoonstelling van kersieprodukte wat kersiemampoer insluit. Die Suid-Afrikaanse Polisiediens se honde en berede vertoning is altyd gewild en daar is ook nog ‘n agt-span Friesperd vertoning. Die aand se vermaak word verskaf deur die Soweto Strykkwartet, Poseletso, Chereè en Robbie Wessels.

Die idee van ‘n kersiefees kom van 1967 toe ‘n groep jong manne ‘n tak van die internasionale leierskap organisasie, Jacee International, te Ficksburg gestig het en na ‘n projek gesoek het om hulle deur diens aan die gemeenskap bekend te stel. Iets rondom kersies was amper vanselfsprekend en die Jaycees het besluit op ‘n fees om die kersiebedryf en die dorp te bevoordeel. Met ‘n nederige begin het die Kersie Karnaval (soos dit bekend gestaan het) bestaan uit ‘n filmvertoning en verkiesing van ‘n kersiekoningin. Die volgende dag was daar ‘n optog van trompoppies deur die dorp se strate asook ‘n versierde vlot waarop die kersiekoningin gepronk het. Die aand was daar ‘n kersiebal. Tans word die kersiefees bedryf deur ‘n komitee van vrywilligers wat deur die gemeenskap verkies word.

Dis duidelik hoekom die Ficksburg Kersiefees jaarliks toeneem in gewildheid aangesien die vermaak jaarliks net beter word. Waar jy ook al in Suid-Afrika is, maak ‘n plan en besoek die 40ste Ficksburg Kersiefees van 15 tot 17 November 2007 vir ‘n groot klomp pret.

 





Combine Flights?













New Business Users, read more and join on the Business Affiliates page.

New Individual Users, join on the Forum Users Registration page.