Izithakazelo

[mbokazi]

Sizani ngezithakazelo zeNkosi uShaka

[KaNdaba]

Nami Mfwethu yizo lezi bengizw' abomkhulu bezisho!
__________________________________________________________________________________

UDlungwana kaNdaba!
UDlungwana woMbelebele,
Odlung' emanxulumeni,
Kwaze kwas' amanxulum' esibikelana.
UNodumehlezi kaMenzi,
USishaka kasishayeki kanjengamanzi,
Ilemb'eleq' amany'amalembe ngokukhalipha;
UShaka ngiyesab' ukuthi nguShaka,
UShaka kuyinkosi yasemaShobeni.
UNomakhwelo ingonyama;
UMahlom' ehlathini onjengohlanya,
Uhlany' olusemehlwen' amadoda.
UDabaz' ithafa ebeliya kuMfene;
UNomashovushovu kaSenzangakhona,
UGaqa libomvu nasekuphatheni.
UBholokoqa bazalukanisile,
Zalukaniswe uNoju noNgqengenye,
EyakwaNtombazi neyakwaNandi;
Yayikhiph' eshoba libomvu,
Ikhishwa elimhlophe lakwaNandi.
Bambiz' eMthandeni beyisela,
Bathi 'Singesinelane neNtungwa lasenhla',
Kanti uzawudl' uPhakathwayo emphindelweni.
UVumavumane lukaphephe,
UDlungwana wavuma na?
Umvumeleni uGodolozi,
Ethi ngowanganeno kwaNandi,
Kant' ukude kwaNtombazana?
Ilanga eliphahl' elinye ngemisebe,
Kalokhu liphahl' eliseMthandeni.
Amazwi mabili engiwabongayo,
Ngibong' elikaMpandaba nelikaNdungenkomo,
Bethi "Ucu aluhlangan' entanyeni";
Akenibuze kwabaseZinkondeni,
Bath'uHilwayo bayakumhlaba kwaHlokohloko,
Kwaf' amasi kwaf' uqephe.
Teku lwabafazi bakwaNomgabhi,
Betekula behlez'emlovini,
Beth' uShaka kakubusa kakuba nkosi,
Kant' unyakan' uShaka ezakunethezeka.
Inkom' ekhal' eMthonjaneni,
Izizwe zonke ziyizwil' ukulila,
Izwiwe uDunjwa waseluYengweni,
Yezwiwa uMangcengeza wakwaKhali.
UMlilo wothathe kaMjokwana;
UMlilo wothathe ubuhanguhangu,
Oshis' izikhova eziseDlebe,
Kwaya kwasha neziseMabedlana.
Odabule kuNdima noMgovu,
Abafaz' abenendeni baphuluza;
Imikhubulo bayishiy' izinqindi,
Imbewu bayishiya semahlangeni,
Izalukazi zasala semanxiweni,
Amaxhegu asala semizileni,
Iziqu zemithi zabheka phezulu.

[KaNdaba]

AbakwaKhumalo bona bathi:

Okhatshwe ngezind'izinyawo
Nangezimfushanyana;
UMkhatshwa wawoZimangele,
Mntungwa!
Mbulaz'omnyama
Abathi bedl'umuntu,
Bebe bemyenga ngendaba.
Abadl'izimf'ezimbili,
Ikhambi laphuma lilinye.
Lobengula kaMzilikazi,
UMzilikazi kaMashobana;
Shobana noGasa kaZikode,
Zikode kaMkhatshwa.
Mabaso owabas'entabeni,
Kwadliwa ilanga lishona
Bantungw'abancwaba!
Zindlovu ezibantu,
Zindlovu ezimacocombela.
Nina bakwaMawela,
Owawel'iZambezi ngezikhali.
Nina bakaNkomo zavul'inqaba
Zavul'inqaba ngezimpondo,
KwelaseNgome.
Nina enal'ukudl'umlenze
KwaBulawayo!
Mantungwa aluhlaza!
Mantungw'amahle!
Bantwana benkosi,
Nina bakwaNtokela!
Inkubele abayihlabe ngamanxeba,
Abamkhule ngezinyawo ezimfushanyana,
Nezimaqhukulwana.
Inyang' abathe beth' ifil'uZulu,
Kanti isiyetheswe,
Yetheswe ngoNyakana ka Mpeyana.
UBando abalubande balushiy' uZulu.
UNyama yentini yawo Zimangele.
UNkomo zavul'inqaba ngezimpondo,
Ngoba zavul'iNgome zahamba.
UNtshwintshwintshwi kaNoyanda noNdaba;
UNkone evele ngobus' emdibini,
Yal' ukudl'umlenze kwaBulawayo.
Ndabezitha!
Maqhaw'amakhulu


_______________________________________________________________

Ngicela abazi ezamaShenge kaNdaba bangisize bo!

[KaNdaba]

ABakwaMdlalose

Nyanda wephandla
Khwenta, Madlula, Mgabashe
Bhudukuziwisa
Phangakufa, Dikane
Wena wephahla elinhloko-nhle
Sphungulo sayongoye
Magutshwa laph engefekhona
Wena kanhlangothi zibomvu amanxela
Wena webhaca elithanda impi ngoba ladla
uDayi kaSkhova

abazukulu kaFasile, kaMpiwenzani, kaThondolozi,
kaNhlaka. (Yikhohlwa lendlu kaNhlaka. Indlunkulu yakhona iNengiseni kaSekethwayo inkosana kaNhlaka. bakhona futhi abakwaMdlalose abaziwa ngo-Jomela. kuseyibo bakhona. Phela, uJomela wakhulela ekhakonina. Ngiyethemba uzoneliseka (Phela uFasile uzalwa yindodakazi kaZiwedu, kaMpande khona le endlunkulu)

[Zamanjomane]

Kwathula nje baphi abantu?
Mthimbane ngangithe ngizozama izithakazelo zabathembu
so here goes:

Mvelase
Nin'enavel'eNyandeni
Ngomthwalo wakwaMabaso
Nina bakwaGogolazitha
Nina bakwaNobasali
Nina bakwaVezi uNonyanda
Nina bakaNgoz'akakhokhobi
Ngoba wakhokhobel'izinkomo zamadoda
Nina bakaVezi kaMandulo
Nina bakaNotsele kaNodada
Nina bakaSibhuzikazi simayikayika
Nina bakaPhumuz'abant'amaphiko
BaThemb'abaseng'inkom'izele
Nina bakaGude
Nonjolo!
Madl'amathiban'indlal'iwile
Nina bakoNonyezi
Amahwanq'amakhulu
Nina baseQhudeni
Ngokudl'iqhude lifile
Khathide!
Maphanga!
Zakwe!
Kunene!
Jubane!
Sobuyase!

Ngiyethemba ngishaye khona.

[Zamanjomane]

ezakwa Khambule

Mncube!
Mzilankatha!
Nina bakwaNkomo zilal'uwaca
Ezamadojeyana zilal'amankengana
Mlotshwa!
Malandel'ilanga
Mpangazitha!
Magosolo!
Nina basebuhlen'obungangcakazi
Abadl'umbilini wenkomo kungafanele
Kwakufanel'udliwe ngabalandakazi
Nina bakaDambuza Mthabathe
Nina basemaNcubeni
Enabalekel'uShaka
Naziphons'emfuleni
Kwakhuz'abantu banifihla
Naphenduk'abakwaKhambule
Nafik'eSwazini
Naphenduk'uNkambule
Nina baseSilutshana
Nin'enakhelana noMbunda
Nina bakaMaweni

[Zamanjomane]

Thina bakwa Mhlongo sithi

Makhedama!
Soyengwase!
Nina bakaBhebhe kaMthendeka
Nina bakaSoqubele onjengegundane
Nina baseSiweni
KwaMpuku yakwaMselemusi
KwaNogwence webaya
Zingwazi zempi yakwaNdunu
Njoman'eyaduk'iminyakanyaka
Yatholakal'onyakeni wesine
Yabuye yatholakala ngowesikhombisa
Langeni
Owavel'elangeni.
#
#
#
Ngaphandle ke uma ngingatshelwanga kahle ekhaya.